Senin, 18 Juni 2012

Inong Balée Lam Tjatatan Seudjarah Atjéh


Keurajdeun Atjeh Darussalam nakeuh keuradjeun njang geupeudong dari padum-padum boh keuradjeun-keuradjeun ubiet miseue keuradjeun Samudra Pasai, keuradjeun Peureulak, dan keuradjeun Pedir. Keuradjeun Atjeh Darussalam njoe mulai geuturi bak masa Sultan Ali Mughayat Sjah, sebagoe Sultan njang peudong keuradjeun njoe.
Keuradjeun Atjèh Darusslam cukop that meu ceuhu bak masa geupimpin ulèh Sultan Iskandar Muda. Beuthat pih meunan, na saboh keudjadian njang cukop that gura bak masa sultan Alaidin Riajat Sjah Al-Mukammil (997-1011 H). Bak masa njan teudjadi prang rayeuk antara armada Seulat Malaka Atjèh ngon armada Portugéh. Prang njan geupimpin keudroe ulèh Sultan Alaidin ngon dikawai ulèh dua droe laksamana.

Prang teulôk Haru meu akhé ngon hantjô armada Portugéh, dan dua dröe laksamana Atjéh sjahid ngon siribée tantra laèn. Beurita meunang armada Seulat Malaka Atjéh geusambôt geumbira uléh mandum ra’jat Atjéh. Beuthat pih meunan, laksamana Malahajati mantong that gram ngon beungéh keu armada Portugéh. Laksama Malahajati nakeuh sidröe sambinöe dari sidröe laksamana njang sjahid dalam prang njan. Laksamana Malahajati geu angkée uléh Sultan Alaidin seubagoe kumeundan protokol meuligöe Darud Dunja.


Kareuna gram ngon beungé keu Portugéh, Malahjati lakèe ubak Sultan untok peugot saboh armada Atjéh njang tantra djih dari ureung inong janda, njang lakoe neuh sjahid dalam prang Teulok Haru. Meulakée Malahajati neu kabul uléh Sultan dan Malahajati geu angkée seubagöe panglima aramada njan. Armada njan teuma geu böh nan armada Inong Balée deungon teulôk Krueng Raja seubagöe pangkalan.  

Malahajati muda na tom geu ikot latihan milité bak pusat peundidékan milité Atjéh njang geuböeh nan Pusat Peundidékan Asykar Baital Maqdis. Gurée dan Mu’allém nakeuh Perwira tantra Turki Usmani njang keureudja sama ngon keuradjuen Atjéh Darussalam.

Malahajati geupilèh angkatan laôt, kareuna lam tubôh neuh ka ilè darah tantra laôt. Abu dan Nék laksamana Malahajati nakeuh tantra armada prang laôt Atjéh. Seumangat dan tjinta Malahajati keu laôt Atjéh dan rasa beuntji keu Portugéh seureuta ngon sjahid samlaköe lam mideuën prang teulôk Haru djeut keu saboh seubab teudong pasukan Inong Balée di keuradjeun Atjéh Darussalam njang geupeudong uléh Sultan Alaidin Mughajat Sjah.

Seugolom armada Inong Balée geupeutrôn lam mideuën prang, tantra Inong Balée njan teuleubéh dilée geulatih uléh laksamana Malahajati ngat tjarong bak meungui seundjata, neukeundali kapai-kapai dan tubôh njang teuga hingga jeut keu tantra njang tanggoh.

Latihan milité njang geubri bak bénténg Inong Balée njang meuteumpat bak gampông Lam Réh, keutjamatan Mesjid Raja, kabupaten Atjéh Besar. Untôk tadjak u teumpat njan pajah tadjak sikilo mété dari djalan Krueng Raja. Bénténg Inong Balée njan na bak binèh djurang dan di mijup djih deuh pantè ngon bate kareung.

Bénténg Inong Balée njan djeut keu teupat peuthëun dröe dan seubagoe teumpat meusilée djanda-djanda njang ka meuninggai laköe dalam mideun prang.  Seulaèn nibak njan, geu ngui sjit seubagöe teunpat keuneubah logistic prang. Dari position dan teumpat, Bénténg Inong Balée njan tjukop that strategis sebagöe wilajah peutheun dröe.

Nan armada Inong Balée njöe keuh njang keumudian geu ngui sebagoe nan saboh keusatuan dalam Geurakan Atjéh Mardehka (GAM) di Atjéh, njang mandum anggéita dari ureung inong-inong Atjéh, peukeuh kaleheuh meukawen atawa mantong dara.

Djasa armada Inong Balée njan tjukôp that peunténg bak peutheun keuradjeun Atjéh Darussalam, dan tjukôp meudjasa bak meudjaga laôt Atjéh nibak peundjadjahan Portugèh njang dimeudjak kuasa ateuh wilajah Atjéh dan dimeudjak kuet hareuta nanggroe Atjéh dengon tjara didjak kuasa laôt seubagoe djalur transport bak masa njan.

Salah saboh keudjadian njan djeut keu meutjeuhu nan Malahajati nakeuh keudjadian Houtman ngon sjédara djih. Armada njang tjukôp that tanggôh njang geupimpin uléh laksamana Malahajati djeut keu seumalée keu Portugéh dan nanggroe Irupa laèn. Kareuna armada Inong Balée njan ka na sireutôh boh kapai dan tiep-tiep kapai leungkap ngon meurijam dan lila-lila.

Kapai njang palèng rajeuk geu bôh limong boh meurijam. Untôk ukuran djameun njan, armada Inong Balée geupandang sebagoe armada yang hajeue di seulat Malaka meunan sjit di samudra Asia Teunggara. Lagée njang ka ditulèh lè Deny Lambard lam buku geuh, “Kerajaan Aceh di Zaman Iskandar Muda.”

Laksamana Malahajati nakeuh aneuk dari laksamana Mahmud Sjah bin laksamana Muhammad Said Sjah bin sultan Salahuddin Sjah (geumat keuradjeun bak thon 936 – 945 H).

Gagah dan tanggôh Malahajati dan armada geuh teubukti bak tanggai 12 juni 1599 M, bak watée njan pasukan Beulanda njang dipimpin uléh Cornelis de Houtman dan Frederijk de Houtman, geuprang uléh pasukan Inong Balée, kareuna dua droe Beulanda meusjédara njang dipimpin pasukan djih untôk djak khianat keuradjeun Atjéh dengan ditôp kapai prang lagée kapai maniaga, karuena armada Atjéh tjukôp that lisèk seuhingga geuteupeue meukeusud kapai Beulanda njan. Hingga armada Inong Balée geu djak prang pasukan Beulanda njan.

Akhè djih Cornelis de Houtman matè geutop lè Laksamana Malahajati ngon rintjông geuh dan sjèdara djih geutawan uléh armada Inong Balée dan geudjôk keu radja Atjéh Darussalam. Sidroe peunuléh inong, Marie van Zeggelen, lam buku djih Oud Glorie, dituléh :

Lam kapai Van Leuw ka djipoh  Cornelis de Houtman dan aneuk buah djih uléh laksamana Malahajati, dan djiserang Frederijk de Houtman uléh sekretaris rahsia djih, hingga ditawan dan diba u darat. Davis dan Tomkins lam keudaan luka.

Seulaèn nibak njan, bak keuradjeun Atjéh Darussalam dituri sjit nan suké Inong Kaway Meuligoe njang geupeudong lè sultan Muda Ali Riajatsjah V (geumat keuradjeun bak thôn 1011 – 1012 H). njang mandum tantra njan dari ureung inong, njang ka meukawèn atawa matong dara. Sukè njan geupeutjaja uléh sultan seubagoe pasukan kaway meuligoe Darud Dunja.

Dalam seudjarah kajèm ta deungo nan-nan inong Atjéh njang meutjuhu njang neuseureuta lam tiep perdjuangan bansa Atjéh, lagée Teungku Fatimah, Potjut Baren, Teungku Fakinah, Potjut Meurah Intan dan laèn lom nibak njan. Ureung njan nakeuh seubagian dari inong Atjéh njang jeut keu peudjuang Atjéh Mardéhka. Njang tjukôp that patôt ta ingat sipanjang masa.

Tradisi militè Atjéh meukeumang ladju sampoe masa keuradjeun sultan Iskandar Muda (1607-1636), hingga sampoe 1873 watée Beulanda dimaklumat prang keu keuradjeun Atjéh Darussalam. Bak masa njan pih patriotism inong Atjéh tjukôp that raja bak djak prang kaphè Beulanda.

Tjukôp that meutjuhu seudjarah Atjéh dan seureuta inong Atjéh lam tiep episode seudjarah, khusus djih pasukan inong balée njang neu pusaka monument seudjarah di Atjéh. That ta harap supaja masjarakat dan pemeurintah neu hiroe akan hai njoe.


Geutardjim dari : www.atjehcyber.net

Tidak ada komentar:

Posting Komentar