BASA ATJÈH ”PRIMITIF”???

Dalam madjallah ”Su Masjarakat Atjèh” (1 Desember, 1986) njang teubiët di Peutawi (Djakareuta) geutanjoë batja deungon hireuën saboh karangan uléh Drs. Ismail Husin, njang disinan djipeugah bahwa basa Atjèh na-keuh saboh basa ”primitif”. Dan meunjoë meunan, maka geutanjoë Atjèhpih nakeuh saboh bansa ”primitif” tjit. Geutanjoë that lom hireuën meunjoë njang tuléhnjoëpih nakeuh bansa Atjèh-tjit sabab ka geudjak peuhina droë dan bansa droë dan basa droë deungon hana ‘èleumèë. Dan ka geudjak sipreuëk haba njang kon-kon djak peusisat dan peuhina bansa droë.

	"Seubatji tgk2 kalon di geuniréng tgk maséng2 , njang Ma dan Du djih atjèh - tapi ka handjeuët lé marit basa atjèh. Bahkan Ma ngon Du bangga watèë si Nyak handjeuët lé djimarit basa Ma djih! Bahkan na "urg2 patôt", "urg2 rajek", "calon2 waki peunjajah djawa di atjèh" aneuk ngon inong ka handjeuët marit lé basa atjèh. Pakriban njoë??? Pakriban geukeumeung atô nanggroë atjèh - meu-aneuk dan inong direumoh hankeumah geu atô?"

Njoë nakeuh saboh dali njang peutunjok bak geutanjoë pakriban ka rhôt seumangat, ka gadoh juëm droë, ka hana lé marwah, ka hana lé keumuliaan droë bak ureuëng2 Atjèh njang teurimong peundédékan kolonialis Djawa, sabab ka djipeukeunong peunjakét ”inferiority complex” (peurasaan-hina-droë) bak siteungoh bansa Atjèh. Jôh masa Beulanda dan jôh masa meurdéhka dilèëkon, bak bansa Atjèh na sipheuët ”superiority complex” (peurasaan-mulia-droë), meunan dji-angkèë uléh Snouck Huurgronje. Uroë njoë sipheuët djroh njan ka meugantoë, ka mubalék nibak njan. Njoëkeuh akibat njang djeuheuët that nibak ”peundidékan” sipa-i Djawa, njang ubé buët kon peundidékan njang djibri, teutapi djipubangai.

Akibat nibak njoë nakeuh bansa Atjèh ka hana lé peumulia droë, dan keumuliaan njan ka djitja'hèt bak bansa gob laén, juëm droë ka dji juë bôh bak gob; deungon geutanjoë han djeuët lé dong keudroë ( handjeuët lé meurdéhka), dan kadjeuët gob peu-ék-peutrôn. Meunjoë gob kheuën geutanjoë ”primitif”, maka ka djiteurimong meunan-meunan ladju deungon hana seumiké sabab handjeuët lé djiseumiké. Dalam sikula sipa-i Djawa hana djipeurunoë seumiké: njang djipeurunoë supaja ta’at keu sipa-i dan bandét2 Djawa dan supaja kagum, tahe, peunjo peuë njang djipeugah lé bansa lua. Njoëkeuh njang geupeunan ”peundjadjahan budaja/kultur” njang djeuët keu mukaddimah, peuneuphôn nibak peundjadjahan politék. Keudjadian diateuh peutunjok bahwa ureuëng2 Atjèh njang ka Djawa didék ka keunong peunjakét ”inferiority complex” dan kadjeuët keu kureubeuën peundjadjahan budaja dan politék.

Dalam karangannjan ka geupeugah bahwa na sidroë ”professor” Amerika (meunandjihpih hana meusoë, hingga karangannjan hana patôt geupeuteubiët sagai2) dan geutanjoë AGAM keumeuëng teupeuë soë nan dan peuë alamatdjih mangat djeuët tameuhubông dan tapeurunoëdjih.

Narit ”primitif” dalam basa2 Eropa meumakna: gasa (lawan daripada halôih); basa njang han keumah peulahé peurasaan njang halôih2 dan mulia; njang han keumah tjukèh haté soë njang deungo; han keumah peuweuëh atawa peukhém, peupatah seumangat atawa peubeuhô; basa njang ban lahé, gasiën dan hana séb keu hudép budaja njang madju; basa njang ban djeuët meususôn dan gohlom sampôrna; basa njang meuriwang bak manusia mantong biadab dan gohlom meu agama; basa njang mantong primitif meumakna gohlom meu-adab, meu-budaja dan gohlom djitu’ôh hudép mumasjarakat.

Basa tanda bansa.

Deungon djipeugah basa geutanjoë primitif, maka djimeukeusud bansa geutanjoëpih primitiftjit. Njoë mandum KON sipheuët basa Atjèh dan KON sipheuët bansa Atjèh. Dalam kitab Encyclopaedia Britannica ka geutuléh bahwa : ”The Achehnese has an ancient civilization” (”Bansa Atjèh ka na saboh tamaddun, keubudajaan, peuradaban njang djameun dan useuëng lagèëna”) njakni njang ka meu-umu meuribèë-ribèë thôn. Bansa Atjèh ka geutumuléh kitab2 dan sja’ir2 dalam basa Atjèh ka meuribèë thôn. Basa njang peulahé sja’ir2 njang tjeudaih2 dan meugah2 lagèë Hikajat Banta Lidan, Hikajat Putroë Hidjô, Hikajat Malém Dagang, Hikajat Hasan Husén, Hikajat Prang Sabi, dan meureutôih njang laén, KON basa primitif!

Tamaddun, keubudajaan dan peuradaban bansa Atjèh kon tamaddun primitif: tamaddun hana bak basa/bansa primitif. Na bak basa/bansa njang ka karang kitab dan sja’ir, bak basa/bansa njang kalheuëh gob peunan ”Seuramoë Makkah”, bak basa/bansa njang ka lheuëh gob angkèë sibagoë ”pusat Dônja Meulaju dalam masa limong abad. Saboh basa/bansa njang paléng madju dan meu-adab didônja Meulaju/Asia Teunggara ka djidjak peugah ”primitif” uléh sidroë Amerika njang hana meusoë nan. Haba2 njang kon-kon lagèënjanpih djitém teurimong uléh ureuëng Atjèh njang ka hana djitu’ôh lé seumiké meurdéhka sabab ka djidjadjah uléh Djawa.

 

	"Alasan njang djipeugah basa geutanjoë ”primitif” nakeuh sabab basa Atjèh nakeuh basa njang ”monosyllable” njakni paneuëk2, sikrak-krak, trang2, glaih2, lagèë basa Inggréh, dan kon lagèë basa Djawa njang panjang2, meubahuë-bahuë, meu’tjuët-’tjuët hana meupeuë sapeuë. Basa Inggréh nakeuh saboh basa njang monosyllable-tjit. Peuë basa Inggréhpih primitiftjit? Pakon basa Atjèh djidjak peugah ”primitif” dan pakon basa Inggréh hana djipeugah primitif? Pakon hana geutanjong peukaranjoë bak ”professor” Amerikanjan? "

Alasan njang djipeugah basa geutanjoë ”primitif” nakeuh sabab basa Atjèh nakeuh basa njang ”monosyllable” njakni paneuëk2, sikrak-krak, trang2, glaih2, lagèë basa Inggréh, dan kon lagèë basa Djawa njang panjang2, meubahuë-bahuë, meu’tjuët-’tjuët hana meupeuë sapeuë. Basa Inggréh nakeuh saboh basa njang monosyllable-tjit. Peuë basa Inggréhpih primitiftjit? Pakon basa Atjèh djidjak peugah ”primitif” dan pakon basa Inggréh hana djipeugah primitif? Pakon hana geutanjong peukaranjoë bak ”professor” Amerikanjan? Uléh Ismail Husin geutuléh bahwa basa Atjèh nakeuh ”basa daerah”, ”basa lokal” dan basa ”suku-bangsa”. Njan mandum KON. Basa Atjèh kon basa ”daerah” teutapi basa saboh Nanggroë: Nanggroë Atjèh njang djameunkon meurdéhka dan meudèëlat. Kon basa ”daerah” nibak djadjahan sipa-i Djawa/indonesia.

Nanggroë Atjéh njoë kon ”daerah” nibak neugara dan bansa luwa. Basa Atjèh kon basa ”lokal” teutapi basa rasmi njang sah dan meugah nibak saboh bansa njang meuriwajat dan meuseudjarah njang gilang-geumilang. Bansa Atjèh kon ”suku-bangsa” njakni sukèë nibak bansa gob laén, teutapi bansa njang dong keudroë, ateuëh Tanoh droë, ateuëh rhuëng dônja. Ismail Husin ka djirhah utak uléh peundidékan salah nibak sipai Djawa peundjadjah, njang ka keunong peunjakét inferiority complex. Hana neuduëk2 ilmiah daripada haba2 gobnjan dan haba ”professor” Amerika gobnjan njan.

‘Ôhlheuëhnjan djidjeuët peugah lom bahwa makna ”primitif”njan nakeuh = asli, murni, dll, sang2 geutanjoë hana tateupeuë sapeuë. Geutanjoë bansa Atjèh djih djak pubangai. Narit peuhina djipeugah narit peumulia. Kamus ka djidjak tuka. Geutanjoë ka djidjak peu aneukmiët: djimarit lagèë djimarit deungon aneukmiët. Dan ureuëng lagèë Ismail Husin geudeungo. Hanséb ‘ôhnan mantong, djinoë ka geudjak peudeungo haba njang kon2 njan ban saboh nanggroë Atjèh. Hingga ka pajah geutanjoë djaweuëb dalam AGAM njoë sabab geutanjoë wadjéb ta peutheuën nan, keumuliaan dan keuhormatan basa dan bansa Atjèh. Meunjoë kon meunan maka peunjakét inferiority complex bansa Atjèh akan meutamah-tamah lom.

Dalam karangannjan djituléh bahwa basa Atjèh kon ‘ôh ka ”primitif” mantong, teutapi leubèh ”primitif” lom lom nibak basa2 sukèë2 bansa Afrika. Djadi geutanjoë Atjèh ka djidjak peubandéng deungon sukéë2 bansa Afrika dan lheuëhnjan djipeuduëk lom dimijuëb awak njang mantong siteungoh hana meu adabnjan. Kheuën djih: ”Banjak bahasa2 lokal jang digunakan suku2 bangsa di Afrika, hampir sama primitifnya dengan bahasa Aceh”. Djadi basa Atjèh leubèëh primitif lom, dimijuëb nibak basa2 primitif Afrika njang laén, meunurôt professor bangai njoë. Kamoë nibak Angkatan Atjèh Meurdéhka peureulèë meuturi professor Amerika njoë mangat djeuët kamoë rhah ulèëdjih deungon èleuméë anthropology, philology dan cultural anthropology njang beutôi2 supaja djih bèk lé djidjak peungeuët ureuëng2 Atjéh njang ka Djawa peubangai. Keu Ismail Husin kamoë lakèë supaja geukirém alamat dan nan djih keu Madjeulih Susôn AGAM di Sweden.. Ureuëng2 aséng njan peureulèë djimeurumpok deungon ureuëng2 ATJÈH MEURDÉHKA bak abad njoë dan handjeuët djidjak tuléh/peugah sapeuë peukara hai Atjèh deungon peutunjok nibak sipa-i Djawa dan djaroë gakidjih.

Njoë pat na saboh ibarat keu geutanjoë bansa Atjéh mandum: ibarat njoë tangui keu alat mangat ridjang ta pham makna nibak peukara/masaalahnjoë dan bahthatpih tangui nan Ismail Husin (sabab gobnjan njang po karangan) kon tadjak peusalah gobnjan sidroë khong sabab ramè lagèëna laén njang mantong seumiké lagèënjan tjit. Dalam hai njoë na tjit djasa Ismail Husin sabab uléh gobnjan ka geupeudeuh saboh peunjakét hingga ka djeuët ta peu-ubat. Peunjakét njan njoë: Ismail Husin ka geudjôk tubôgeuh, basageuh, agamageuh, adatgeuh, reusamgeuh, bandum djitimang lé kaphé, deungon tjéng nibak kaphé njan, dan keuneulheuëh ka geuteurimong jum gobnjan njang djibôh lé kaphé njan. Jum njang djibôh njan nakeuh: si keuëh (”primitif”). Sikap gobnjan salah that. Hana geuteupeuë bahwa saboh2 bansa handjeuët sagai2 djak juë timang droë bak bansa laén. Saboh2 bansa handjeuët teurimong dji-tjéng uléh bansa laén, peuë lom dalam tjéng djih. Saboh2 bansa handjeuët teurimong djibôh juëm lé bansa luwa, bôh Djawa atawa Beulanda, atawa Amerika. Soëtjit njang djeuët bôh juëm geutanjoë? HANA LAÈN NIBAK DROËTEUH. GEUTANJOË ATJÈH KEUDROË.

 

	"Watèë ureuëng Atjèh geutém teurimong djipeu-ék/peutren jum-geuh uléh sipa-i Djawa bak thôn 1945, maka uroënjankeuh mulai phôn peundjadjahan sipa-i Djawa ateuëh bansa Atjèh. Hingga djinoë bansa geutanjoë ka djipeugah ”sukèë” nibak bansadjih (na’uzubillah) dan naggroë geutanjoë ka djipeugah ”daerah” nibak naggroëdjih (na’uzubillah) dan njang djeuheuët that lom ka le ureuëng geutanjoë njang ka maté urat saraf, njakni handjeuët seumiké lé, ka geuteurimong haba2 njang bateuë dan kon2 njan. Bansa geutanjoë ka keumah djidjadjah pikéran, budaja, leubèëh dilèë jôhgohlom keumah djidjadjah dalam politék. "

Watèë ureuëng Atjèh geutém teurimong djipeu-ék/peutren jum-geuh uléh sipa-i Djawa bak thôn 1945, maka uroënjankeuh mulai phôn peundjadjahan sipa-i Djawa ateuëh bansa Atjèh. Hingga djinoë bansa geutanjoë ka djipeugah ”sukèë” nibak bansadjih (na’uzubillah) dan naggroë geutanjoë ka djipeugah ”daerah” nibak naggroëdjih (na’uzubillah) dan njang djeuheuët that lom ka le ureuëng geutanjoë njang ka maté urat saraf, njakni handjeuët seumiké lé, ka geuteurimong haba2 njang bateuë dan kon2 njan. Bansa geutanjoë ka keumah djidjadjah pikéran, budaja, leubèëh dilèë jôhgohlom keumah djidjadjah dalam politék. Lheuëh siplôh thôn geutanjoë Peunjata Atjèh Meurdéhka keulai mantong tjit ureuëng2 njang teumuléh dan peuteubiët karangan2 njang djeuët keu masaalah nibak tulésan njoë. Njoënakeuh saboh tanda bahwa peunjakét inferiority complex mantong meuradjalèla dalam tubôh bansa Atjèh. Peunjakét njoë wadjéb geutanjoë peu-ubat beu bagaih, deungon meurunoë èleumèë njang beutôi nibak seudjarah Atjèh, tamaddun Atjèh, njang bandum kalheuëh na meutuléh dalam kitab2 njang geupeuteubiët uléh ANGKATAN ATJÈH MEURDÈHKA dalam masa 10 thôn njang akhé2 njoë.

Uléh sipa-i Djawa ramè djigadji ”professor” Eropa dan Amerika sibagoë tôkkang propaganda ideologi peundjadjahan indonesia/djawa njang djijuë djak meungadjar bak ”sikula2 tinggi” Djawa mangat ridjang geutanjoë teurimong peuë njang sipa-i Djawa peugah. Sang2 ideologi sipa-i ka dônja angkèë. ”Professor” agent Djawanjoë nakeuh lagéë Hjort dari Norway, William Liddle, Amerika, dan meuplôh njang laén. Awak njoë djimeututô pura2 ateuh nan ilmiah padahai peuë njang djih peugah njan nakeuh propaganda sipa-i Djawa mantong, dan kon ateuëh neuduëk èleumèë. Geutanjoë ureuëng2 ATJÈH MEURDÈHKA sabé keumaih bak tameuhôdjdjah ngon djih dalam sigala èleumèë dan dalam sigala basa. Lagèë si Hjort dari Norway kalheuëh djimeuhôdjdjah deungon geutanjoë AM diluwa naggroë dan kalheuëh djilakèë meu’ah, teutapi lheuëhnjan katrôih awak Atjéh njang njang ka Djawa rhah ulèë lagèë Fachri Ali njang ka djak sipreuëk haba si Hjort dalam nanggroë bak ureuëng Atjéh laén rot surat2 haba Djawa dan djidjak peugah ANGKATAN ATJÈH MEURDÈHKA ka gagal. Kamoë keumeuëng ngiëng muka Fachri Ali njoë njang djak tuléh bahwa Angkatan Atjèh Meurdéhka ka ”gagal”. Atawa djih njan kon bansa Atjèh? Sabab djitumuléh lagèë sidroë peunonton njang hana beuheuëk dalam peurdjuangannjoë, dan djidjak ngiëng masaalah geutanjoë Atjèh rot katjamata ureuëng2 aséng njang hana teupeuë sapeuë, dan njan bandum djisangka ateuëh neuduëk ilmiah, padahai kon sagai2 teutapi djih hana djiteupeuë sapeuë. Djameun, Snouck Huurgronje njang djak sidék bansa Atjéh keu keupeunténgan politék dan militer Beulanda. Buët Huurgronje hana laén nibak buët mata2, kon buët èleumèë: teutapi djipropaganda sibagoë buët èleumèë mangat le ureuëng peutjaja dan haba2 intelligence anti Atjèh djipeugah haba ilmiah. Djinoë ramè lagèëna Huurgronje barô njang djigadji uléh sipa-i Djawa.

Soëtjit njang djeuët dan patôt bôh juëm ateuëh geutanjoë? Sigo tereuëk: hana laén nibak droëteuh. Geutanjoë bansa Atjèh keudroë. handjeuët sagai2 bansa gob. Lagèë kheuën Nietzsche, filosof Djerman: ”Hana saboh bansa djeuët djihudép meunjoë hana djipeumulia droëdjih leubèëh dilèë.” Djeuëb bansa pajah djimeurunoë peumulia droë. Meukon meunan hana keumah djihudéb meurdéhka, teutapi djeuët keu lamiët nibak bansa laén, njankeuh djadjahan. Padum tabôh juëm bansa Atjèh njoë? Meunjoë ta tanjong bak Beulanda atawa Djawa maka hana djibôh juëm meusisèn: padum na ka bansa Atjéh, inong-agam, tuha-muda, njang ka djitimbak dan djiélanja hana meupeuë-sapeuë dan deungon hana djipadôli? Padum tabôh juëm bansa Atjèh njoë? Dimasa éndatu dan bak masa droëneuhnjan hudéb ka geupeuleumah : hana soë ék bôh juëm keumuliaan bansa Atjèhnjoë, hana séb pèng dalam dônja keu juëm geutanjoë, dan han ta tém peubloë bansa/nanggroë/keumuliaan/keumeurdékaan geutanjoë keu bansa2 laén: leubèh got ta maté sjahid nibak ta peubloë droë keulamiët/ djadjahan gob. Sabab dumnan neupeumulia droë/bansa/neugara-keuh maka éndatu geutanjoë ka neupiléh maté sjahid nibak djak-djôk droë bak Beulanda. Njoëkeuh njang wadjéb geutanjoë peulaku uroë njoë, djinoë. Njoëkeuh tjita2 ANGKTAN ATJÈH MEURDÉHKA:

Kheuën Nietzsche lom: ”Peumulia, njan maknadjih peudong, peukong.” Watèë hana ta peumulia, njan maknadjih ka ta reuloh dan tapeugadoh. Watèë simbôl2 bansa dan neugarateuh hana tamulia lé, lagèë Bandéra, Uroë2 Raja Neugara dan Hukôm, maka bansa2 lagèënjan han keumah meurdéhka lé dan akan didjadjah lé bansa teuka, lagèë Atjèh djinoë ka djidjadjah lé sipa-i Djawa.

Geukheuën lom uléh Nietzsche: ”Meunjoë saboh2 bansa djikeumeuëng peuseulamat droë bèk gadoh/talô ateuëh rhuëng dônja maka handjeuët sagai2 djidjak tirèë2 upatjara keumuliaan njang djipeugot uléh bansa2 laén njang djirandjih.” Geutanjoë Atjèh handjeuët sagai tadjak tirèë upatjara Djawa, atawa Beulanda, atawa bansa2 laén. Geutanjoë wadjéb ta seutot dan tapeulara adat, reusam, pusaka nibak éndatu turôn-tumurôn lagéë tjara droëteuh. Njoënakeuh rahasia nibak keumeurdéhkaan dan nibak bansa2 njang ka ék peutheuën keumeurdéhkaandjih nibak pakon ka ék djipeuteheuën droëdjihnjan. Peuë njang djipandang djroh uléh saboh bansa hana peureulèë djipandang djroh uléh bansa njang laén. Keuneuleuëh njang meunang njankeuh njang tém peutheuën adat-reusam droë; njang talô njang djak sutot2 gob laén. Njankeuh sabab geutanjoë wadjéb tagisa bak agama Atjèh, bak adat Atjèh, bak reusam Atjèh. ”Primitif” djipeugah? Djih njan peugahnjan njang primitif - bak mata geutanjoë Atjèh dan njankeuh Hukôm di Nanggroë Atjèh.

Peuë njang djipeugot uléh bansa gob nakeuh keu keupeunténgan bansadjihnjan, kon keupeunténgan bansa geutanjoë. Seunipatdjih, tjéng-djih, njan bandum handjeuët tangui meunan2 mantong uléh geutanjoë. Peuë njang djipeugah ”èleumèë” (scientific) njan kon musti njoe meunan. Bansa2 Barat djidjak meurampok bansaboh dônja trôk u Nanggroë Atjèh teutapi buët djihnjan hantom djibôh nan meurampok: djih bôh nan ”mission civilisatrice” (djidjak bri adab keu ureuëng2 primitif); dan buëtnjan djingiëng nakeuh ”white man’s burden” (tanggông djaweuëb bansa putéh) dan njan bandum djipeugah deungon alasan2 njang djih peunan ilmiah (scientific). Teuma, peuë njan tadjak deungo dan tadjak peu-njo? Buët ”professor Amerika” Ismail Husin nakeuh dalam hôn buët seumeungeuët njoë, sabab hana alasan2 ilmiah njang ék peudong propagandadjih di Djawanjan njang meutudjuan peuhina bansa Atjèh dan peutamah inferiority complex bansa Atjèh supaja mudah djidjadjah lé bandét2 Djawa.

Le that peuë lom keusalahan dalam karangan Ismail Husin njang pajah tapeukon. Lagèë geudjak peubandéng basa Atjéh - saboh basa njang ka Tuhan peudjeuët - deungon basa ”indunisia” - hana bansa, hana nanggroë, hana basa - bahthatpih geutanjoë teupeuë njang djimeukeusud basa Meulaju - basa njang na Tuhan peudjeuët lagèë basa Atjèhtjit - teutapi ka djipeutamong dalam karanga Ismail Husin dalam basa Grik njang hana meusangkôt sapeuë deungon Dônja Meulaju dan basa Meulaju. Bandum ”lelutjon” njoë ka djipeugot mangat peubeuna peundjadjahan sipa-i Djawa ateuëh bansa2 dan pulo2 lua Djawa, demi kepenténgan peundjadjahan Djawa: mangat djeuët djibri keusan keu dônja luwa njang hana teupeuë sapeuë sang2 keubit na ”bansa indonesia” deungon ka na ”basa indonesia” - padahai njoë mandum meuneu’èn sung-glap sipa-i Djawa mangat djeuët djipeungeuët awak Eropa/Amerika njang djeu-ôh lagoina, teutapi pakriban djeuët djidjak pengeuët geutanjoë disinoë di Dônja Meulaju njang toë, njang teupeuë hana ”basa indonesia”njan, njang na njankeuh basa Meulaju, njang na hubôngan deungon basa Atjèh. Seudang basa Djawa keudroëdjih hana hubôngan sapeuë deungon basa Atjéh. Uléh sipeundjadjah Djawa ka dji-ubah nan basa Meulaju djeuët keu ”basa indoensia” mangat djeuët djipeutoë-toë droë djih deungon geutanjoë. Bèk deuh that peundjadjahandjih. Padahai geutanjoë bansa Atjèh dan bansa2 Meulaju njang laén hana tateupeuë meusikrèk basa Djawa haramdjah tjilakanjan. Deungon djidjak bôh nan basa Meulaju sibagoë ”basa indonesia”, Ismail Husin hana sadar ka djidjak bantu peudong peundjadjahan Djawa ateuëh bansa droë. Peukara na kata2 panjang dan kata2 paneuk dalam saboh2 basa, njan na saboh hai njang biasa njang geupham dalam èleumèë philology dan linguistics.

 

	"Ismail Husin geutôp karangan deungon naritnjoë: ”Sayapun, melalui Professor ahli bahasa ini, lebih mengenal karakteristik bahasa ibu saya.” Deungon narit laén geumeungaku gobnjan hana geuturi sipheuët2 basa ureuëngtjhik inong-geuh njang peulahé gobnjan dan geupiëp-mom-geuh, lagèë geutanjoë mandum tjit, njang dumnan toë, lahé ngon batén deungon gobnjan, jôhgohlom djipeuraba lé ”Professor ahli” dari amerika, njang duëk diblahdéh dônja, njang hana djipham basa Atjèh, njang hantom djidjak u Atjèh. Masya Allah. Keu ureuëng2 lagéë gobnjan, peuë njang djipeugah lé ureuëng luwa, njang kon Atjèh, peuë lom Amerika, njan dumpeuë ka njo bahthatpih njang kon-kon. Talakèë do’a beuridjang puléh peunjakét inferiority complex nibak gobnjan. "

Ismail Husin geutôp karangan deungon naritnjoë: ”Sayapun, melalui Professor ahli bahasa ini, lebih mengenal karakteristik bahasa ibu saya.” Deungon narit laén geumeungaku gobnjan hana geuturi sipheuët2 basa ureuëngtjhik inong-geuh njang peulahé gobnjan dan geupiëp-mom-geuh, lagèë geutanjoë mandum tjit, njang dumnan toë, lahé ngon batén deungon gobnjan, jôhgohlom djipeuraba lé ”Professor ahli” dari amerika, njang duëk diblahdéh dônja, njang hana djipham basa Atjèh, njang hantom djidjak u Atjèh. Masya Allah. Keu ureuëng2 lagéë gobnjan, peuë njang djipeugah lé ureuëng luwa, njang kon Atjèh, peuë lom Amerika, njan dumpeuë ka njo bahthatpih njang kon-kon. Talakèë do’a beuridjang puléh peunjakét inferiority complex nibak gobnjan.

Sumber: Madjalah AGAM